Tregu i punës në Zvicër mbetet në stagnim

Numri i vendeve të lira të punës ka rënë lehtë në tremujorin e dytë, ndërsa shëndetësia, industria dhe IT-ja vazhdojnë të kërkojnë punëtorë

Tregu i punës në Zvicër po vazhdon të tregojë shenja stagnimi. Sipas Swiss Job Market Index nga Adecco Group Switzerland dhe Universiteti i Cyrihut, numri i vendeve të lira të punës në tremujorin e dytë të vitit 2026 ka rënë me 2.4 për qind krahasuar me tremujorin e parë, transmeton albinfo.ch.

Krahasuar me të njëjtën periudhë të vitit të kaluar, rënia është shumë më e vogël, vetëm 0.2 për qind, që tregon se tregu nuk është në rënie të thellë, por më shumë në një fazë pritjeje dhe pasigurie.

Megjithatë, zhvillimet nuk janë të njëjta në të gjithë sektorët. Kërkesa për punëtorë është rritur dukshëm në disa fusha. Në sektorin e shëndetësisë, numri i vendeve të lira është rritur me 17 për qind, ndërsa në zanate dhe industri rritja ka qenë 12 për qind. Po ashtu, vende më shumë pune janë shpallur edhe në administratë dhe punë zyre, me rritje prej 9 për qind, si dhe në IT, ku kërkesa është rritur me 6 për qind.

Në anën tjetër, rënie është shënuar në profesionet shkencore, komerciale dhe ekonomike. Sipas Adecco-s, ky zhvillim lidhet me pasigurinë ekonomike dhe perspektivën më të zymtë për disa degë të ekonomisë.

Ekspertët theksojnë se, pavarësisht stagnimit të përgjithshëm, mungesa e punëtorëve të kualifikuar mbetet problem në Zvicër, sidomos në shëndetësi, ndërtimtari dhe industri.

Kjo tregon se tregu zviceran i punës është më selektiv: disa sektorë po ngadalësohen, ndërsa të tjerët vazhdojnë të kenë nevojë të madhe për staf të ri.

---