MPJD u bën thirrje qytetarëve të shmangin kalimin përmes Serbisë

Ministria e Punëve të Jashtme dhe Diasporës u ka bërë thirrje qytetarëve të Kosovës, përfshirë bashkatdhetarët që jetojnë në mërgatë dhe planifikojnë të udhëtojnë drejt Kosovës, që të përdorin rrugë alternative dhe të shmangin kalimin përmes territorit të Serbisë.

Gjatë sezonit të pushimeve, numri i mërgimtarëve që udhëtojnë drejt Kosovës rritet ndjeshëm, ndërsa një pjesë e madhe e tyre kalojnë përmes pikave kufitare me Serbinë, raporton rtk, përcjell Albinfo.ch.

Me këtë rast, MPJD ka përsëritur thirrjen për kujdes, duke pasur parasysh rastet e raportuara të ndalimeve, kontrolleve të zgjatura dhe arrestimeve të qytetarëve të Kosovës nga autoritetet serbe.

Para pak ditësh, autoritetet serbe arrestuan Osman Selmanin, nën dyshimet e ngritura nga Serbia për pretendime lidhur me krime lufte gjatë vitit 1999.

Ndërkohë, gjatë viteve të fundit janë raportuar edhe raste të tjera të ndalimeve dhe marrjeve në pyetje të qytetarëve të Kosovës, kryesisht nën akuza për shkelje të rendit kushtetues të Republikës së Serbisë.

Përmes një njoftimi, MPJD ka apeluar që bashkatdhetarët të zgjedhin rrugë alternative për udhëtimin drejt Kosovës, për të shmangur situata të mundshme të papërshtatshme gjatë kalimit nëpër Serbi.

Sipas MPJD-së, përmes Zyrës Ndërlidhëse të Republikës së Kosovës në Serbi, monitorohen dhe trajtohen të gjitha rastet e raportuara nga qytetarët ose familjarët e tyre.

Ministria gjithashtu njofton vazhdimisht delegacionin e Bashkimit Evropian në Serbi dhe ka dërguar nota verbale pranë misioneve diplomatike të vendeve të Quint-it të akredituara në Serbi./Albinfo.ch/