Studentët nga Kosova shkëlqejnë në kampin ndërkombëtar të sigurisë kibernetike në Vjenë

Lorik Kelmendi zuri vendin e parë në garën “AI Mini CTF”, Senad Mehmeti u rendit i dyti, ndërsa nxënësja Era Dragusha u dallua në kategorinë junior.

Ekipi Kosova Cyber Team po përfaqëson Kosovën në Vienna International Ethical Hacking Boot Camp, një nga aktivitetet ndërkombëtare të dedikuara trajnimit praktik të të rinjve në fushën e sigurisë kibernetike dhe forcimit të bashkëpunimit ndërkombëtar në ethical hacking, transmeton albinfo.ch.

Kampi po zhvillohet në Vjenë dhe mbledh rreth 120 pjesëmarrës nga 12 shtete.

Që në garat e para, studentët nga Kosova shënuan rezultate të shkëlqyera. Lorik Kelmendi ishte i pari që zgjidhi sfidën e parë dhe e përfundoi garën “AI Mini CTF” në vendin e parë. Pas tij u rendit Senad Mehmeti, duke i siguruar ekipit kosovar dy pozitat kryesore të garës.

Në kategorinë junior u dallua edhe Era Dragusha, e cila grumbulloi 1.050 pikë, duke konfirmuar potencialin e saj në fushën e sigurisë kibernetike.

Për suksesin e ekipit është vlerësuar edhe puna e trajnerëve Kastriot Fetahaj, Robert Shala dhe Arbnor Halili, të cilët janë përgëzuar për angazhimin dhe përgatitjen e vazhdueshme të pjesëmarrësve.

Aktiviteti do të vazhdojë me garat attack/defense, ku ekipet do të përbëhen nga pjesëmarrës ndërkombëtarë, ndërsa pritet që përfaqësuesit e Kosovës të vazhdojnë paraqitjet e suksesshme. /Albinfo.ch

---