Pse Zvicra po përballet gjithnjë e më shpesh me valë të forta të nxehti?

Eksperti i ETH shpjegon arsyet

Zvicra përjetoi në fund të qershorit një nga valët më intensive të të nxehtit në historinë e saj. Temperaturat rekord dhe 12 ditë radhazi me vapë ekstreme kanë ngritur pyetjen nëse kjo po bëhet tashmë “normaliteti i ri”, përcjell albinfo.ch.

Sipas klimatologut Reto Knutti nga ETH Cyrih, ditët me temperatura mbi 30 gradë nuk janë një fenomen i ri, por ndryshimet klimatike kanë bërë që ato të ndodhin shumë më shpesh dhe të zgjasin më gjatë.

“Në Zvicër temperaturat janë rritur me pothuajse 3 gradë. Kjo do të thotë se pragu i të nxehtit tejkalohet më shpesh dhe valët e vapës ndërpriten më rrallë”, shpjegon Knutti.

Ai thekson se rreth 80 për qind e valëve të fundit të të nxehtit mund të shpjegohen me faktin se i njëjti mot po ndodh në një klimë shumë më të ngrohtë se më parë.

Sipas ekspertit, çdo valë e të nxehtit lidhet me kushte të caktuara atmosferike, veçanërisht me sisteme të fuqishme të presionit të lartë, të cilat mbeten të qëndrueshme për ditë të tëra.

“Çdo valë e të nxehtit është e lidhur me motin. Për këtë nevojitet një zonë me presion të lartë,” thotë ai.

Knutti shton se vitet e fundit këto sisteme atmosferike po bëhen më të qëndrueshme. Në vend që të zgjasin vetëm dy ose tre ditë, ato mund të mbeten mbi rajon për më shumë se një javë, duke sjellë periudha të gjata me mot të kthjellët dhe temperatura shumë të larta.

Shkencëtarët ende po studiojnë arsyet pse këto bllokime atmosferike po ndodhin më shpesh, por një nga shpjegimet është se ato lidhen me ndryshimet e motit mbi Atlantikun Lindor.

Sipas ekspertëve, vala rekord e vapës që përjetoi Zvicra këtë verë nuk duhet të shihet si një rast i izoluar, por si një tregues i kushteve klimatike që pritet të bëhen gjithnjë e më të zakonshme në vitet e ardhshme./Albinfo.ch

---