Vala e të nxehtit godet Italinë, pesë viktima në 24 orë

Temperaturat ekstreme kanë shkaktuar pesë viktima në Itali, ndërsa autoritetet kanë shpallur alarm të kuq në 25 qytete. Ndërkohë, pritet një ndryshim i motit me reshje shiu dhe breshër në veri të vendit.

Vala e fortë e të nxehtit që ka përfshirë një pjesë të madhe të Evropës po vazhdon të shkaktojë pasoja të rënda edhe në Itali. Sipas të dhënave të Organizata Botërore e Shëndetësisë, pesë persona kanë humbur jetën në 24 orët e fundit si pasojë e temperaturave ekstreme, përcjell albinfo.ch.

Për shkak të situatës, autoritetet italiane kanë shpallur alarm të kuq – nivelin më të lartë të rrezikut – në 25 qytete të mëdha të vendit. Sipas parashikimeve meteorologjike, temperaturat e larta do të vazhdojnë edhe gjatë ditës së nesërme.

Megjithatë, sinoptikanët parashikojnë një ndryshim të kushteve atmosferike duke filluar nga pasditja e së mërkurës. Në shumë zona të Italisë veriore priten reshje të dendura shiu, të shoqëruara në disa raste edhe me breshër, ndërsa moti i paqëndrueshëm pritet të përfshijë edhe rajonet qendrore të vendit gjatë së enjtes.

Për të lehtësuar ndikimin e vapës, shumë bashki italiane kanë marrë masa për mbrojtjen e qytetarëve dhe turistëve. Muze të shumtë janë hapur falas deri në përfundim të valës së të nxehtit, ndërsa së bashku me palestrat dhe qendrat kulturore po shfrytëzohen si “strehë klimatike”, ku njerëzit mund të qëndrojnë në ambiente të freskëta gjatë orëve me temperaturat më të larta. /Albinfo.ch

---