Artistja kosovare Albe Hamiti përfaqëson Kosovën në bienalen prestigjioze Manifesta 16 në Gjermani

Me projektin e saj të ri “De-Life”, artistja do të prezantojë Kosovën në një nga ngjarjet më të rëndësishme të artit bashkëkohor në Evropë.

Artistja kosovare Albe Hamiti do të përfaqësojë Kosovën në edicionin e 16-të të Manifesta 16, një nga bienalet më prestigjioze të artit bashkëkohor në Evropë, e cila hapet zyrtarisht në rajonin Ruhr të Gjermanisë, transmeto albinfo.ch.

Në këtë edicion marrin pjesë mbi 100 artistë dhe kolektive artistike nga 30 vende të botës, të cilët do të prezantojnë rreth 64 projekte të reja të realizuara posaçërisht për këtë ngjarje ndërkombëtare.

Hamiti do të prezantohet me projektin “De-Life”, një vepër e krijuar enkas për Manifesta 16, e mbështetur edhe nga Ministria e Kulturës, Rinisë dhe Sportit e Republikës së Kosovës.

Pjesëmarrja e saj në këtë bienale konsiderohet një arritje e rëndësishme për artin kosovar dhe një mundësi për promovimin e krijimtarisë bashkëkohore të Kosovës para publikut ndërkombëtar.

Manifesta 16 pritet të mbledhë artistë, kuratorë dhe vizitorë nga e gjithë bota, duke shërbyer si një platformë e rëndësishme për dialogun artistik dhe kulturor./Albinfo.ch

---