Lumi Aare arrin temperaturën më të lartë në histori

Rekorde të reja u regjistruan në 19 stacione meteorologjike, ndërsa ngrohja e lumit detyroi edhe masa në sektorin energjetik

Vala ekstreme e të nxehtit vazhdon të shkruajë histori në Zvicër. Të shtunën, 19 stacione meteorologjike regjistruan temperatura rekord, ndërsa në Bazel dhe Beznau termometri arriti në 39 gradë Celsius, duke vendosur një rekord të ri kombëtar për muajin qershor.

Përveç temperaturave të larta të ajrit, edhe lumi Aare arriti nivelin më të lartë të temperaturës të regjistruar ndonjëherë, duke tejkaluar rekordin e vendosur në gusht të vitit 2022. Sipas ekspertëve, temperatura e lartë e ujit po ushtron presion mbi ekosistemin e lumit dhe infrastrukturën energjetike, transmeton albinfo.ch.

Si pasojë e ngrohjes së Aare-s, autoritetet zvicerane ndërmorën masa për mbrojtjen e mjedisit, duke kufizuar funksionimin e centralit bërthamor të Beznau, i cili përdor ujin e lumit për ftohje.

Meteorologët theksojnë se vala e të nxehtit, e shkaktuar nga një sistem i fuqishëm me presion të lartë mbi Evropë, ka sjellë temperatura rekord në disa vende të kontinentit. Megjithatë, gjatë ditëve në vijim priten reshje shiu dhe stuhi që mund të sjellin një lehtësim të përkohshëm edhe në Zvicër.

---