Kosova prezantohet në Paris, në fokus kultura, turizmi dhe potenciali i vendit

Kosova prezanton potencialin e saj kulturor dhe turistik në Paris

Republika e Kosovës është promovuar në Paris në një aktivitet të veçantë të organizuar nga Cercle Diplomatique de Paris, ku u prezantuan potencialet kulturore, turistike dhe zhvillimore të vendit para përfaqësuesve të diplomacisë, biznesit, kulturës dhe shoqërisë civile, përcjell albinfo.ch.

Në këtë ngjarje mori pjesë ministrja e Kulturës dhe Turizmit, Saranda Bogujevci, e cila theksoi rëndësinë e promovimit të Kosovës në arenën ndërkombëtare përmes kulturës, artit dhe turizmit.

Gjatë prezantimit u vu në pah trashëgimia kulturore e Kosovës, potenciali turistik, zhvillimi i sportit, si dhe energjia dhe kreativiteti i brezit të ri dhe i diasporës shqiptare.

Bogujevci vlerësoi se aktivitete të tilla kontribuojnë në forcimin e imazhit të Kosovës dhe krijojnë mundësi të reja për bashkëpunim ndërkombëtar. Ajo shprehu falënderim për organizatorët, Ambasadën e Kosovës në Francë dhe artistët shqiptarë që morën pjesë në promovimin e vendit.

“Përmes kulturës, artit dhe suksesit të qytetarëve tanë, vazhdojmë të forcojmë praninë dhe imazhin e Kosovës në arenën ndërkombëtare”, u shpreh ministrja Bogujevci./Albinfo.ch

---