SHBA hyn në Librin Guinness me topin më të madh të futbollit në botë

SHBA thyen Rekordin Guinness me topin më të madh të futbollit në botë

Një top gjigant me diametër gati 48 metra është vendosur në Boston, duke thyer rekordin e mëparshëm të mbajtur nga Katari dhe duke u bërë atraksion i veçantë në prag të Kupës së Botës FIFA, përcjell albinfo.ch.

Shtetet e Bashkuara të Amerikës kanë hyrë zyrtarisht në Librin e Rekordeve Guinness pasi ndërtuan topin më të madh të futbollit në botë.

Instalacioni gjigant, i vendosur në Piers Park II në East Boston, ka një diametër prej 47.9 metrash dhe është certifikuar nga Guinness World Records si topi më i madh i krijuar ndonjëherë.

Me këtë arritje, SHBA-ja ka tejkaluar rekordin e mëparshëm të vendosur nga Katari në vitin 2013, kur ishte ndërtuar një top futbolli me diametër 39.98 metra.

Projekti u realizua nga kompanitë Britten Inc. dhe Creative Inflatables nga Ohio, si pjesë e aktiviteteve promovuese për ndeshjet e Kupës së Botës FIFA që do të zhvillohen në zonën e Bostonit, në stadiumin e Foxborough, gjatë muajve qershor dhe korrik.

Topi gjigant do të mbetet i ekspozuar për vizitorët deri më 18 qershor, duke tërhequr vëmendjen e tifozëve dhe turistëve që vizitojnë qytetin.

Autoritetet kanë njoftuar se pas përfundimit të ekspozimit, të gjitha materialet e përdorura për ndërtimin e topit do të riciklohen. /Albinfo.ch

---