Mijëra qytetarë të Kosovës votojnë sot në ambasada dhe konsullata

Diaspora i drejtohet kutive të votimit

Rreth 27 mijë shtetas të Kosovës, të regjistruar për votim fizik jashtë vendit, kanë mundësinë ta ushtrojnë sot të drejtën e votës në përfaqësitë diplomatike të Republikës së Kosovës për zgjedhjet e 7 qershorit, transmeton albinfo.ch.

Procesi i votimit ka nisur nga ora 07:00 dhe do të vazhdojë deri në orën 19:00, varësisht nga zonat kohore dhe lokacionet ku ndodhen përfaqësitë diplomatike.

Sipas të dhënave të Komisionit Qendror të Zgjedhjeve (KQZ), votimi organizohet në 47 vendvotime të vendosura në 17 ambasada dhe 13 konsullata të Kosovës, të shpërndara në 18 shtete të ndryshme.

Për votim fizik në përfaqësitë diplomatike janë regjistruar gjithsej 27.724 qytetarë të Kosovës, duke shënuar një nga pjesëmarrjet më të mëdha të diasporës në proceset zgjedhore.

KQZ ka bërë të ditur se votuesit duhet të paraqiten me një dokument identifikimi të vlefshëm të Republikës së Kosovës, si letërnjoftim, pasaportë ose patentë shoferi.

Pjesëmarrja e diasporës konsiderohet me rëndësi të veçantë në këto zgjedhje, duke reflektuar lidhjen e vazhdueshme të bashkatdhetarëve me proceset demokratike dhe zhvillimet politike në Kosovë./Albinfo.ch

---