Interesim i madh për votimin në Ambasadën e Kosovës në Vjenë

Interesim rekord në Vjenë, mbi 1.100 të regjistruar për votim në ambasadë

Procesi i votimit për zgjedhjet e 7 qershorit ka nisur në orën 07:00 në Ambasadën e Republikës së Kosovës në Vjenë dhe, sipas informacioneve të para, gjithçka po zhvillohet normalisht dhe pa probleme, transmeton albinfo.at.

Për dallim nga proceset e kaluara zgjedhore, këtë herë është vërejtur një interesim dukshëm më i madh i qytetarëve për të votuar fizikisht në ambasadë.

Sipas të dhënave të siguruara nga albinfo.at, për zgjedhjet e 7 qershorit janë regjistruar gjithsej 1.125 votues për të votuar fizikisht në Ambasadën e Kosovës në Vjenë. Ndërkohë, 3.308 shtetas të Kosovës që jetojnë në Austri janë regjistruar për votim përmes postës.

Krahasuar me zgjedhjet e dhjetorit 2025, numri i qytetarëve të regjistruar për votim në ambasadë është pothuajse dyfishuar, duke dëshmuar rritjen e interesimit të diasporës për të marrë pjesë në procesin zgjedhor.

Sipas Komisionit Qendror të Zgjedhjeve, votimi fizik në Austri organizohet vetëm në Ambasadën e Republikës së Kosovës në Vjenë, në adresën Prinz-Eugen-Straße 8-10, A-1040 Vjenë. Qytetarët mund të votojnë duke paraqitur një dokument identifikimi të Republikës së Kosovës, si letërnjoftim, pasaportë ose patentë shoferi.

Në nivel global, KQZ-ja ka bërë të ditur se janë regjistruar 109.696 qytetarë të Kosovës që jetojnë jashtë vendit. Prej tyre, 81.901 janë regjistruar për votim me postë, 2.855 për dërgimin e pakos së fletëvotimit në kutinë postare të KQZ-së, ndërsa 24.940 për votim fizik në përfaqësitë diplomatike.

Kujtojmë se në zgjedhjet parlamentare të 8 shkurtit 2025, për herë të parë diaspora pati mundësinë të votonte fizikisht në ambasada dhe konsullata. Në Austri, atëherë ishin regjistruar 941 votues, ndërsa votuan 732 prej tyre.

Ndërsa në zgjedhjet e parakohshme të 28 dhjetorit 2025, nga 532 qytetarë të regjistruar në Vjenë, votuan 431. Pjesëmarrja më e ulët u lidh me periudhën e fundvitit, kur shumë bashkatdhetarë udhëtojnë drejt Kosovës për festat e fundvitit.

---