Ambasada e Kosovës në Bernë njofton mërgatën: Më 6 qershor 2026 hapen qendrat e votimit në Zvicër

Votimi fizik për qytetarët e regjistruar paraprakisht zhvillohet në Bernë, Gjenevë dhe Cyrih – lejohet edhe votimi me dokumente të skaduara

Ambasada e Republikës së Kosovës në Bernë ka njoftuar qytetarët e Kosovës që jetojnë në Zvicër se votimi fizik në kuadër të procesit zgjedhor do të mbahet më 6 qershor 2026 (e shtunë), në disa pika votimi të hapura në përfaqësitë diplomatike të Kosovës në këtë shtet, transmeton albinfo.ch.

Sipas njoftimit zyrtar, procesi i votimit do të organizohet në ambientet e Ambasada e Republikës së Kosovës në Bernë, si dhe në konsullatat në Konsullata e Republikës së Kosovës në Gjenevë dhe Konsullata e Republikës së Kosovës në Cyrih.

Të drejtë vote do të kenë vetëm qytetarët e Republikës së Kosovës që janë regjistruar paraprakisht për votim fizik në përfaqësitë diplomatike.

Po ashtu, në kuadër të lehtësimit të procesit zgjedhor për diasporën, Komisioni Qendror i Zgjedhjeve i Kosovës ka miratuar vendimin që qytetarët të mund të votojnë edhe me dokumente identifikimi të skaduara. Ky vendim vlen vetëm për ata që janë regjistruar paraprakisht për votim fizik në ambasada dhe konsullata.

Dokumentet e pranueshme për identifikim janë: pasaporta, letërnjoftimi dhe leja e vozitjes e Republikës së Kosovës, përfshirë edhe ato me afat të skaduar.

Komisioni Qendror i Zgjedhjeve i Kosovës thekson se ky lehtësim synon t’u mundësojë bashkatdhetarëve të ushtrojnë të drejtën e tyre kushtetuese për të votuar pa pengesa administrative.

Për shkak të numrit të madh të qytetarëve që pritet të marrin pjesë në votim, autoritetet rekomandojnë përdorimin e transportit publik, në mënyrë që të shmangen pritjet dhe vështirësitë në qarkullim dhe parkim.

Procesi i votimit do të zhvillohet vetëm më 6 qershor 2026 (e shtunë).

“Pjesëmarrja juaj është zëri juaj. Shfrytëzojeni të drejtën për të votuar!” – thuhet në fund të njoftimit të ambasadës. /Albinfo.ch

---