Aksident tragjik në Belgjikë: treni përplaset me autobus shkollor, disa viktima

Katër të vdekur pas përplasjes në një kalim hekurudhor në qytetin Buggenhout

Në qytetin Buggenhout në Belgjikë, një tren është përplasur me një autobus shkollor, duke shkaktuar një aksident të rëndë me pasoja fatale, përcjell albinfo.ch.

Sipas raportimeve të televizionit RTL, duke u bazuar në deklaratat e ministrit të transportit Jean-Luc Crucke, nga aksidenti kanë humbur jetën katër persona: dy adoleshentë, një i rritur dhe shoferi i autobusit.

Ngjarja ka ndodhur rreth orës 08:08 të mëngjesit në një kalim hekurudhor, rreth një kilometër larg stacionit të Buggenhoutit.

Zëdhënësi i operatorit hekurudhor belg Infrabel, Frédéric Sacré, ka deklaruar për agjencinë AFP se përplasja ka qenë “jashtëzakonisht e fortë”, duke e përshkruar bilancin si “tragjik”.

Autoritetet belge kanë nisur hetimet për të zbuluar shkaqet e aksidentit, ndërsa zona e ngjarjes është siguruar nga ekipet emergjente. /Albinfo.ch

---