Inaugurohet “Biblioteka shqiptare në diasporë” në Bolzano

Një hapësirë e re kulturore për gjuhën shqipe dhe librin u përurua në Biblioteca Civica “Cesare Battisti”

Në qytetin Bolzano është përuruar këndi i ri i “Bibliotekës shqiptare në diasporë” në ambientet e Biblioteca Civica Cesare Battisti, një nismë e rëndësishme kulturore për promovimin e gjuhës dhe identitetit shqiptar jashtë vendit, transmeton albinfo.ch.

Kjo iniciativë është realizuar nga Qendra e Botimeve për Diasporën në bashkëpunim me shoqatën Arbëria Bolzano, duke krijuar një hapësirë të dedikuar për librin, gjuhën shqipe dhe aktivitetet edukative për komunitetin shqiptar në Itali.

Në këtë aktivitet morën pjesë përfaqësues të institucioneve dhe komunitetit, përfshirë drejtoreshën e QBD-së, zj. Mimosa Hysa, si dhe përfaqësues të bibliotekave dhe institucioneve lokale në Bolzano, bashkë me anëtarë të shoqatës dhe familje shqiptare që jetojnë në rajon.

Gjatë ceremonisë u zhvilluan lexime dygjuhëshe, aktivitete edukative dhe momente festive për fëmijët, duke e kthyer bibliotekën në një hapësirë takimi mes kulturave dhe brezave të ndryshëm.

Në kuadër të këtij bashkëpunimi, u dhurua edhe një fond librash në gjuhën shqipe, me qëllim pasurimin e koleksionit dhe nxitjen e leximit tek fëmijët e diasporës.

Ky kënd i ri kulturor pritet të shërbejë si urë lidhëse mes brezave shqiptarë në diasporë, duke kontribuar në ruajtjen e gjuhës, traditës dhe identitetit kombëtar. /Albinfo.ch

 

---