Investim i madh nga diaspora e Zvicrës: Peja bëhet qendër e re e prodhimit të shtëpive të prefabrikuara

Në Zahaq të Pejës është inauguruar fabrika e re e kompanisë GreenHouse SHPK, një investim i rëndësishëm në industrinë e prodhimit të shtëpive të prefabrikuara në Kosovë.

Ky projekt është rezultat i një vizioni të nisur rreth 10 vite më parë nga sipërmarrësit nga diaspora shqiptare në Zvicër, Visar Rexhepaj dhe Nazmi Mehmetaj. Ata filluan aktivitetin e tyre me një hapësirë të vogël me qira, ndërsa sot kanë realizuar një fabrikë moderne dhe të pajisur me teknologji të avancuar, transmeton albinfo.ch.

Objekti i ri industrial ka një sipërfaqe prej rreth 12,000 m² dhe ka kapacitet të prodhimit të një shtëpie të prefabrikuar në ditë. Rreth 90% e prodhimit të kompanisë destinohet për eksport në tregjet evropiane.

Në ceremoninë e inaugurimit morën pjesë përfaqësues institucionalë dhe figura publike, përfshirë kryetarin e Komunës së Pejës Gazmend Muhaxheri, si dhe ish-kryeministrin Ramush Haradinaj. Të pranishëm ishin gjithashtu përfaqësues të industrisë së drurit, institucioneve dhe partnerëve të biznesit.

Ky investim u vlerësua si një shembull i zhvillimit të qëndrueshëm ekonomik, duke theksuar rolin e diasporës në sjelljen e kapitalit dhe ekspertizës në vend.

Sipas organizatorëve, projekti përfaqëson një kombinim të punës së palodhur, vizionit afatgjatë dhe lidhjes me vendlindjen.

Fabrika e re e GreenHouse SHPK pritet të rrisë ndjeshëm kapacitetet prodhuese dhe të forcojë më tej praninë e produkteve “Made in Kosova” në tregjet ndërkombëtare.

---