Ekonomia e Zvicrës ka nisur vitin 2026 më fuqishëm se pritjet e ekspertëve, pavarësisht pasigurive globale dhe rritjes së çmimeve të energjisë.
Sipas të dhënave paraprake të publikuara nga SECO, ekonomia zvicerane u rrit me 0.5% gjatë tremujorit të parë të vitit 2026, krahasuar me vetëm 0.2% në fund të vitit të kaluar, raporton Reuters, transmeton albinfo.ch.
Rritja ishte më e lartë edhe se mesatarja afatgjatë e ekonomisë zvicerane dhe u mbështet nga zgjerimi i sektorit industrial dhe atij të shërbimeve, si dhe nga rritja e eksporteve.
Ekspertët thonë se eksportet u ndihmuan edhe nga ulja e përkohshme e tarifave amerikane në fillim të vitit. Megjithatë, ata paralajmërojnë se tensionet në Lindjen e Mesme dhe çmimet më të larta të energjisë mund të ndikojnë negativisht në muajt e ardhshëm.
Sipas ekonomistëve, Zvicra mbetet më pak e ekspozuar ndaj krizave energjetike sesa shumë vende të tjera evropiane, pasi industria zvicerane konsumon relativisht më pak energji dhe energjia ka peshë më të vogël në inflacionin e vendit.
Qeveria zvicerane vazhdon të parashikojë rritje ekonomike modeste prej rreth 1% për gjithë vitin 2026, nën mesataren historike të vendit.
