Angelin Preljocaj në qendër të një mbrëmjeje artistike në Muzeun Luvër

Koreografi me origjinë shqiptare u prezantua me veprën “Le Parc” nën piramidën ikonike të Louvre, në kuadër të ekspozitës “Michel-Angel Rodin. Living bodies”.

Një mbrëmje e veçantë artistike është mbajtur në Musée du Louvre në Paris, ku Paris Opera Ballet ka performuar nën piramidën ikonike të muzeut, në kuadër të ekspozitës “Michel-Angel Rodin. Living bodies”, transmeton albinfo.ch.

Në qendër të kësaj nate të jashtëzakonshme ishte koreografi me origjinë shqiptare Angelin Preljocaj, i cili u prezantua me veprën e tij të njohur “Le Parc”, e mirëpritur me entuziazëm nga publiku për elegancën, ndjeshmërinë dhe forcën artistike që përcolli në skenë.

Prania e Preljocajt në një nga hapësirat më prestigjioze kulturore në botë konsiderohet një moment i rëndësishëm, jo vetëm për karrierën e tij, por edhe për prezantimin e artit shqiptar në arenën ndërkombëtare.

I shoqëruar nga muzikantët e Paris Opera Orchestra, aktiviteti solli dy shfaqje që u vlerësuan si të paharrueshme, duke krijuar një ndërthurje të veçantë mes vallëzimit dhe artit skulpturor. Mbrëmja vuri në pah fuqinë shprehëse të lëvizjes, bukurinë e trupit në dinamikë dhe dialogun intim mes kërcimit dhe skulpturës.

Programi artistik përfshiu gjithashtu edhe vepra të njohura si “Rhapsody” nga Frederick Ashton, “Three Gnossiennes” nga Hans van Manen dhe “Supercorps” nga Yvon Demol.

Ky aktivitet i pazakontë konfirmoi edhe një herë rolin e Parisit si një qendër botërore e kulturës, ndërsa suksesi i “Le Parc” dëshmoi ndikimin dhe kontributin e artistëve me origjinë shqiptare në skenat më prestigjioze ndërkombëtare. /Albinfo.ch

---