Fjalimet frymëzuese të Granit Xhakës, zbulohet ndikimi i tij te Sunderland

(KEYSTONE/Gian Ehrenzeller)

Sunderland pësoi humbje dramatike me rezultat 4:3 ndaj Aston Villës të dielën, në një ndeshje ku goli vendimtar u shënua në minutën e 93-të. Megjithatë, ajo që ra në sy ishte reagimi i skuadrës, e cila arriti ta rikthejë rezultatin nga 3:1 në 3:3, duke treguar mentalitet të fortë në fushë.

Mesfushori Noah Sadiki ka zbuluar se një rol kyç në këtë rikthim kishte kapiteni Granit Xhaka, i cili mbajti një fjalim motivues në momentet më të vështira të ndeshjes.

“Te rezultati 3:1, Graniti bëri një bisedë në mes të fushës”, ka thënë Sadiki, duke folur për mediat angleze.

Sipas tij, Xhaka u dha shpresë bashkëlojtarëve duke i motivuar që të mos dorëzohen:

“Ai më tha, nëse shënojmë një herë, ka shpresë për të fituar ndeshjen. Shënuam një herë, pastaj barazuam. Është 3:3 dhe pastaj ke një shans të fundit. Kur nuk shënon të ndëshkojnë përsëri”, ka treguar Sadiki.

Sadiki ka shtuar se Sunderland ishte shumë pranë një rezultati të madh ndaj një kundërshtari të fortë si Aston Villa, e cila po lufton për zonën e Ligës së Kampionëve dhe është në gjysmëfinale të Ligës së Evropës.

“Ishim shumë afër një disfate të madhe, por ishim gjithashtu shumë afër fitores. Kjo është ndjesia e përzier që kemi pas ndeshjes. Mendoj se treguam mentalitet dhe treguam se mund t’i bëjmë ballë edhe klubeve që janë më lart se ne”, është shprehur Sadiki.

Ndërkohë, ndikimi i Xhakës nuk është vërejtur vetëm në fushë. Të martën, anëtari i bordit të drejtorëve të Sunderlandit, Leo Pearlman, ka zbuluar një mesazh të fuqishëm të kapitenit drejtuar tifozëve gjatë një ndeshjeje ndaj Liverpoolit në “Stadium of Light”.

Pearlman ka treguar se gjatë një momenti kritikash nga tribunat, Xhaka reagoi me qetësi dhe vendosmëri:

“Mbani mend nga kemi ardhur. Qëndroni të përulur”, kishte thënë Xhaka, sipas Pearlmanit, duke i dhënë një mesazh të qartë tifozëve dhe skuadrës.

Sipas drejtuesit të klubit, kjo ndërhyrje e Xhakës tregoi karakterin e tij si lider dhe ndikimin e madh që ai ka brenda ekipit, jo vetëm si futbollist, por edhe si figurë motivuese dhe udhëheqëse./Albinfo.ch