FSK-ja drejt Gazës, Amerika vendos për nisjen e trupave nga Kosova

Angazhimi ndërkombëtar do të udhëhiqet nga SHBA dhe mund të sjellë përfitime ushtarake dhe diplomatike për Kosovën

Nisja e pjesëtarëve të Forcës së Sigurisë së Kosovës (FSK) drejt një misioni ndërkombëtar në Gazë nuk do të varet drejtpërdrejt nga institucionet e Kosovës, por nga vendimmarrja e Shteteve të Bashkuara të Amerikës, përkatësisht nga gjenerali amerikan që pritet të udhëheqë Forcën Stabilizuese në terren, përcjell albinfo.ch.

Kështu ka deklaruar ish-komandanti i FSK-së, Kadri Kastrati, i cili theksoi se gjenerali amerikan do të përcaktojë kohën e nisjes, mënyrën e angazhimit dhe kohëzgjatjen e misionit, në përputhje me planifikimet operative.

Sipas tij, edhe mbështetja logjistike për këtë operacion pritet të sigurohet nga SHBA-ja, pasi kapacitetet vendore nuk janë të mjaftueshme për një mision të tillë ndërkombëtar.

Kastrati vlerësoi se FSK-ja është e përgatitur sipas standardeve të NATO-s dhe mund të kontribuojë në fusha specifike si çminimi, si dhe përmes oficerëve shtaborë dhe policisë ushtarake.

“Në përgjithësi, forcat tona janë të përgatitura. Do të shkojnë ekipe për deminim dhe oficerë shtaborë. FSK-ja është lidere në këtë fushë dhe ka përvojë të mirë nga trajnimet në vendet e NATO-s,” u shpreh ai.

Ai shtoi se ky angazhim do të ketë ndikim pozitiv edhe në aspektin politik dhe diplomatik, duke e shndërruar Kosovën nga një vend përfitues i sigurisë në një kontribuues aktiv në misionet ndërkombëtare.

Sipas Kastratit, vendimi për nisjen dhe kohëzgjatjen e misionit do të varet plotësisht nga komandanti amerikan që udhëheq operacionin, në bashkëpunim me strukturat ndërkombëtare në terren./Albinfo.ch

---