BQK dhe Banka e Francës nënshkruajnë marrëveshje të re për menaxhimin e rezervave ndërkombëtare

BQK dhe Banka e Francës zgjerojnë bashkëpunimin për rezervat ndërkombëtare

Në kuadër të Takimeve Pranverore 2026 të Fondit Monetar Ndërkombëtar dhe Bankës Botërore, të mbajtura në Washington DC, Guvernatori i Bankës Qendrore të Republikës së Kosovës (BQK), Ahmet Ismaili, zhvilloi një takim bilateral me drejtues të Bankës së Francës, me qëllim avancimin e bashkëpunimit ndërinstitucional, përcjell albinfo.ch. 

Gjatë këtij takimi, Guvernatori Ismaili dhe Ivan Odonnat, Drejtor i Përgjithshëm për Operacione dhe Stabilitet Financiar në Bankën e Francës (Banque de France), nënshkruan një Marrëveshje të re, e cila zgjeron bashkëpunimin në fushën e menaxhimit të mjeteve dhe rezervave ndërkombëtare, duke përfshirë edhe kategori të reja të aseteve.

Me këtë rast, Ismaili theksoi rëndësinë strategjike të kësaj marrëveshjeje për sektorin financiar të Kosovës, duke e cilësuar atë si një hap të rëndësishëm drejt zgjerimit dhe modernizimit të kornizës për menaxhimin e rezervave, në përputhje me zhvillimet globale.

“Korniza e vendosur përmes kësaj Marrëveshjeje i mundëson BQK-së hapjen e llogarive të alokuara për rezerva jo-monetare, duke garantuar pronësi të plotë dhe ndarje të qartë nga asetet e palëve të treta. Po ashtu, kjo kornizë i mundëson BQK-së përdorimin e këtyre rezervave si kolateral në operacione ndërkombëtare, duke ofruar fleksibilitet shtesë dhe mundësi për menaxhim më efikas të likuiditetit”, thuhet në njoftimin e BQK-së.

Në kuadër të bashkëpunimit, palët diskutuan gjithashtu për ngritjen e kapaciteteve profesionale të BQK-së, zhvillimin e trajnimeve të specializuara, si dhe mundësitë për përfshirje në fusha të tjera, përfshirë edhe avancimin e kapaciteteve në fushën ESG, pjesëmarrjen në rrjete përkatëse dhe bashkëpunimin me institucione të tjera të rëndësishme të mbështetura nga Banka e Francës.

Sipas njoftimit, Odonnat theksoi përkushtimin e Bankës së Francës për të mbështetur bankat qendrore në zbatimin e praktikave të qëndrueshme, transparente dhe të sigurta për menaxhimin e rezervave.

BQK vlerëson se kjo marrëveshje plotëson iniciativat ekzistuese, përfshirë mandatin aktiv të investimeve dhe pjesëmarrjen në Programin e Thesarit të Grupit të Bankës Botërore (RAMP), duke forcuar më tej kapacitetet për menaxhim efektiv të aseteve rezervë.

Në përfundim, BQK thekson se kombinimi i efikasitetit operacional, transparencës dhe përputhshmërisë me standardet ndërkombëtare përfaqëson një avancim të rëndësishëm në menaxhimin strategjik të rezervave, duke kontribuar në stabilitetin financiar afatgjatë dhe qëndrueshmërinë institucionale të Kosovës. /Albinfo.ch 

---