Itali: Shqiptarja dënohet me 30 vjet burg për vrasje të dyfishtë

Itali: 30 vjet burg për shqiptaren që vrau prindërit e partnerit të saj

Gjykata e Kasacionit në Itali ka dënuar me 30 vite burg 41-vjeçaren shqiptare E.K, e shpallur fajtore për vrasjen e dyfishtë të T.P dhe Sh.P, prindërit e të dashurit të saj të atëhershëm, T.P, përcjell albinfo.ch.

Sipas mediave italiane, dy viktimat u zhdukën në nëntor të vitit 2015, vetëm një ditë para se djali i tyre, i cili ndodhej i ndaluar në burgun Sollicciano për çështje të lidhura me drogën, të lirohej nga burgu.

Trupat e tyre u gjetën vetëm pas pesë vitesh, të copëtuar dhe të futur në katër valixhe, të braktisura në një fushë mes autostradës Fi-Pi-Li dhe burgut Sollicciano.

Hetimet kanë ngritur dyshime se E.K mund të ketë pasur më shumë se një motiv për kryerjen e këtij krimi të rëndë. Njëri prej motiveve dyshohet të ketë qenë financiar, pasi viktimat thuhet se mbanin me vete një shumë të konsiderueshme parash, të cilat dyshohet se kishin lidhje me aktivitetet e paligjshme të djalit të tyre në trafikun e drogës.

Sipas autoriteteve, me këto para E.K dyshohet se i ka kthyer të dashurit të saj një borxh prej 20 mijë eurosh, të marrë para se ai të përfundonte në burg.

Një tjetër motiv, sipas dyshimeve, lidhet me rrethana personale. Prokuroria ka ngritur dyshime se viktimat mund të kishin zbuluar shtatzëninë e saj, të cilën ajo dyshohet se e kishte ndërprerë vullnetarisht në spitalin Careggi, vetëm pak ditë para krimit.

Gjykata e Kasacionit, me vendimin e saj, ka lënë në fuqi dënimin me 30 vite burg, duke e bërë përfundimtar verdiktin ndaj 41-vjeçares shqiptare./Albinfo.ch

 

---