EuroAirport i Bazelit mbyll pothuajse plotësisht pistën kryesore për disa javë

Nga 15 prilli deri më 20 maj 2026 do të kryhen punime rinovimi në pistën kryesore, vetëm kompania ajrore EasyJet do të vazhdojë disa fluturime të kufizuara nga aeroporti

EuroAirport Basel–Mulhouse–Freiburg do të ndërpresë pothuajse të gjitha fluturimet për disa javë për shkak të rinovimit të pistës kryesore. Punimet do të zgjasin nga 15 prilli deri më 20 maj 2026, periudhë gjatë së cilës shumica e kompanive ajrore që operojnë në këtë aeroport kanë anuluar fluturimet e tyre, përcjell albinfo.ch.

Sipas njoftimit të aeroportit, gjatë kësaj kohe do të përdoret vetëm pista dytësore, e cila është më e shkurtër. Për këtë arsye, më shumë se 25 kompani ajrore që zakonisht operojnë nga ky aeroport kanë vendosur të pezullojnë përkohësisht fluturimet, pasi pista alternative nuk konsiderohet e përshtatshme për avionët e tyre.

Megjithatë, kompania ajrore me kosto të ulët EasyJet do të vazhdojë operimet me një numër të reduktuar fluturimesh. Ajo do të kryejë rreth shtatë fluturime në ditë, që përfaqësojnë rreth 15 për qind të aktivitetit të saj të zakonshëm në këtë aeroport.

Gjatë kësaj periudhe, EasyJet do të përdorë avionë të tipit Airbus A320 për të fluturuar vetëm drejt disa destinacioneve më të afërta në Evropë, përfshirë Hamburg, Palermo, London, Palma de Mallorca, Porto dhe Barcelona.

Arsyeja është se për fluturimet në distanca më të shkurtra avionët mbajnë më pak karburant, duke qenë më të lehtë dhe duke mundësuar përdorimin e pistës dytësore.

Megjithatë, operimet do të përballen edhe me disa sfida. Pista dytësore nuk është e pajisur me sistemin e uljes me instrumente (ILS), që do të thotë se pilotët duhet të kryejnë uljen vetëm me orientim vizual. Për këtë kërkohet një dukshmëri minimale prej të paktën pesë kilometrash, ndërsa kushtet e vështira të motit si stuhitë, reshjet e dendura të shiut apo erërat e forta mund të kufizojnë fluturimet./Albinfo.ch

---