Begaj në Samitin e Diasporës: Diaspora, faktor kyç në rrugën e Shqipërisë drejt BE-së

Në fjalën e tij gjatë ceremonisë së mirëseardhjes në Samitin e IV të Diasporës, Presidenti Bajram Begaj e vlerësoi diasporën shqiptare si një element thelbësor dhe të pazëvendësueshëm në procesin e integrimit të Shqipërisë në Bashkimin Evropian.

Kreu i shtetit u shpreh se marrëdhënia mes shtetit dhe diasporës për një kohë të gjatë ka qenë e bazuar kryesisht në lidhje emocionale, por sipas tij kjo qasje ka ndryshuar dhe sot ajo po merr një karakter më strategjik dhe më të qëndrueshëm për zhvillimin e vendit, raporton rtsh transmeton albinfo.ch.

Ai theksoi se Shqipëria ndodhet në një moment vendimtar në rrugën drejt BE-së dhe se diaspora shqiptare luan rol të rëndësishëm në këtë proces, duke e cilësuar atë si një forcë që ndikon në shtrirjen dhe suksesin e një kombi.

Sipas Begajt, shqiptarët në diasporë janë të pranishëm në fusha të ndryshme si teknologjia, akademia, biznesi, sporti dhe arti, duke u shndërruar në përfaqësues të rëndësishëm të vendit në arenën ndërkombëtare. Ai nënvizoi se ky potencial duhet të shfrytëzohet më shumë dhe në mënyrë më të organizuar.

Presidenti shtoi se modeli i mëparshëm i marrëdhënies vetëm emocionale ka përfunduar dhe se tani po ndërtohet një qasje e re ku diaspora shihet si partner i drejtpërdrejtë në zhvillimin ekonomik dhe shoqëror të Shqipërisë.

Ai e përshkroi diasporën si një mbështetje të rëndësishme ekonomike për dekada, por theksoi se tashmë duhet kaluar në një fazë ku ajo kontribuon si investitor dhe partner aktiv në zhvillimin e vendit.

Në fjalën e tij, Begaj bëri thirrje që investimet dhe njohuritë e diasporës të kthehen në projekte konkrete zhvillimi në Shqipëri, duke forcuar bashkëpunimin me institucionet vendase.

Duke folur për procesin e integrimit, ai theksoi rëndësinë e ruajtjes së identitetit kombëtar edhe në rrugën drejt anëtarësimit në BE, duke përmendur nevojën për më shumë investime në gjuhën shqipe, arsimin dhe qendrat kulturore në diasporë.

Në përfundim, Presidenti deklaroi se e ardhmja duhet të ndërtohet mbi lidhje më të forta me diasporën, duke e parë atë si pjesë të pandashme të zhvillimit të vendit dhe si urë lidhëse me botën.