Aksident tragjik në Itali, humbin jetën dy të rinj shqiptarë

Aksident fatal në Cuneo, vdesin dy shqiptarë dhe plagosen tre persona

Një aksident i rëndë rrugor ka ndodhur mbrëmjen e djeshme në Itali, duke u marrë jetën dy të rinjve shqiptarë dhe duke lënë tre persona të tjerë të plagosur, transmeton albinfo.ch.

Ngjarja ka ndodhur në rrugën Strada Sanità, në segmentin provincial që lidh Savigliano me Vottignasco, në provincën e Cuneos – një zonë e njohur për rrugën e ngushtë dhe historikun e aksidenteve të rënda.

Sipas mediave italiane, automjeti tip Jeep, në të cilin udhëtonin tre të rinjtë shqiptarë, është përplasur ballë për ballë me një mjet të rëndë Iveco. Goditja ka qenë jashtëzakonisht e fortë, ndërsa dinamika e plotë e aksidentit ende nuk është sqaruar dhe mbetet nën hetim nga autoritetet.

Në kamion ndodheshin një burrë 58-vjeçar dhe një grua 55-vjeçare. Burri është transportuar në spital në kod të verdhë, ndërsa gruaja ka pësuar plagë të rënda dhe është dërguar me helikopter në spitalin Santa Croce në Cuneo, në kod të kuq.

Në vendin e ngjarjes ndërhynë menjëherë ekipet e emergjencës me dy autoambulanca, shërbimi ajror elisoccorso 118 dhe zjarrfikësit, të cilët punuan për një kohë të gjatë për të nxjerrë viktimat dhe të plagosurit nga mjetet e dëmtuara rëndë.

Karabinierët kanë nisur hetimet për zbardhjen e plotë të rrethanave, ndërsa po verifikohet edhe mundësia që aksidenti të jetë shkaktuar nga një parakalim i rrezikshëm. Për disa orë, rruga qëndroi e bllokuar dhe trafiku u devijua./Albinfo.ch

---