11 të arrestuar nga policia italiane pas një përleshje, disa me origjinë shqiptare

Dhuna në barin e San Sisto përfundon me 11 arrestime

Një përleshje e dhunshme që shpërtheu të dielën në mbrëmje në një bar në San Sisto, Itali, ka sjellë arrestimin e 11 personave, ndërsa një i mitur 17-vjeçar rezulton në arrati. Operacioni u zhvillua nga Policia Italiane, dhe të arrestuarit u dërguan në burgun e Capanne, përcjell albinfo.ch.

Të arrestuarit, të moshës 19–31 vjeç, me origjinë shqiptare, rumune dhe maqedonase, janë banorë të Panicale, Piegaro, Passignano sul Trasimeno, Montegabbione dhe Tavernelle. Pesë prej tyre kanë precedentë të mëparshëm penalë.

Sipas hetuesve, përleshja ka nisur rreth orës 18:45 në zonën e pushimit të Sant’Andrea delle Fratte, ku ndodhet edhe bari. Një grup shqiptarësh dhe një grup maqedonasish u përfshinë në grindje, e cila u përshkallëzua nga një mosmarrëveshje e vogël dhe një foto e bërë me celular.

Dy të rinj u përpoqën të largoheshin me makinë, por goditën një nga sulmuesit gjatë ikjes. Viktima, një 27-vjeçar nga Maqedonia e Veriut, u dërgua në spitalin e Perugias me fraktura të shumta në gjymtyrët e poshtme dhe ka një prognozë 30-ditore.

Policia ndërhyri shpejt pas thirrjes në numrin 112, duke mundësuar arrestimin e shumicës së autorëve në flagrancë, ndërsa kërkimi për dy të arratisurit vazhdon. Hetimet paraprake, të bazuara në deklaratat e dëshmitarëve dhe pamjet nga kamerat e sigurisë, konfirmojnë se grindja ka shpërthyer për shkaqe të parëndësishme.

Në vendngjarje, policia ka sekuestruar disa shkopinj, njëri prej tyre 65 cm i gjatë, si dhe karrige dhe tavolina të përdorura në përleshje. Një 23-vjeçar shqiptar u kap duke tentuar të fshehë çelësin e ndezjes së makinës brenda një vazoje lulesh dhe iu gjet edhe 0.6 gramë kokainë.

Të gjithë të arrestuarit akuzohen për sulm të rëndë, ndërsa hetimet përfundimtare për ngjarjen dhe për identifikimin e të miturit në arrati vazhdojnë./Albinfo.ch

---