Ministri Pfister: “30 avionë nuk janë të mjaftueshëm në planin afatgjatë”

"Do të ishin të mjaftueshëm vetëm për vendosje afatshkurtra, por jo për mbrojtje të qëndrueshme"

Duke u shprehur lidhur me vendimin për të blerë më pak aeroplanë luftarakë F-35 sesa ishte planifikuar, Ministri i Mbrojtjes Martin Pfister  tha se “vendimi në Këshillin Federal u nxit kryesisht nga parimet demokratike”.

Këtë e ka deklaruar Pfister në programin e lajmeve të së shtunës të transmetuesit publik të Zvicrës, SRF.

Ata (ministrat) donin të respektonin vendimin e popullit, shpjegoi më tutje Pfister, transmeton albinfo.ch. Dhe Këshilli Federal kishte përcaktuar dhe shqyrtuar në një raport se sa avionë ishin në të vërtetë të nevojshëm.

Mbrojtja është një mandat kushtetues.

Nëse Zvicra dëshiron të mbrohet, atëherë 30 avionë nuk do të jenë të mjaftueshëm, deklaroi Pfister. Do të ishin të mjaftueshëm vetëm për vendosje afatshkurtra, por jo për mbrojtje të qëndrueshme.

Departamenti i Mbrojtjes planifikon të paraqesë prioritetet e tij për dy vitet e ardhshme deri në fund të janarit 2026.

---