Ngjarje e rëndë në Zakynthos, qeni i familjes i merr jetën 2 vjeçarit shqiptar

Tragjedi për familjen shqiptare, 2-vjeçari humb jetën pas sulmit nga kafshimi i pitbull-it në Zakynthos

Një ngjarje tragjike ka ndodhur në fshatin Agios Leontas në ishullin Zakynthos, ku një fëmijë shqiptar 2-vjeçar ka humbur jetën pasi është sulmuar nga qeni i familjes, i racës pit bull, teksa po luante në oborrin e shtëpisë, transmeton albinfo.ch.

Sipas mediave greke, përfshirë rrjetin publik ERT, vogëlushi ndodhej vetëm për pak çaste, kur iu afrua vendit ku ishte lidhur qeni, i cili e sulmoi duke i shkaktuar plagë të rënda.

Prindërit e fëmijës, babai me origjinë shqiptare dhe nëna nga Anglia, e dërguan menjëherë në Spitalin e Përgjithshëm të Zakynthos, ku mjekët u përpoqën ta mbanin në jetë, por për fat të keq ndërroi jetë si pasojë e plagëve.

Babai i viktimës, në një deklaratë për mediat vendase, shprehu dhimbjen e tij të thellë:

“Vajza ime e vogël më thirri dhe unë vrapova. Kaq mbaj mend… Djali im i vogël iku.”

Ai shtoi se qeni ishte endacak dhe ishte marrë në shtëpi për ta mbrojtur nga banorët e zonës.

Policia greke ka ndaluar për marrje në pyetje prindërit, ndërsa autoritetet kanë nisur një hetim për të sqaruar plotësisht rrethanat e ngjarjes.

Komuniteti lokal në Zakynthos është shprehur i tronditur nga kjo tragjedi./Albinfo.ch

---