Gjeneva refuzon ndihmën për kujdesin dentar

Popullsia e Gjenevës ka refuzuar me një diferencë të ngushtë si nismën, ashtu edhe kundërpropozimin për shëndetin oral. Sipas rezultateve përfundimtare, iniciativa “Për kujdes dentar të aksesueshëm” u hodh poshtë me 50.07% vota kundër. Edhe kundërpropozimi, i cili synonte ta përfshinte nismën në ligj dhe t’i kërkonte shtetit hartimin e një plani veprimi, u refuzua me 55.59% të votave.

Nisma e Partisë Socialiste parashikonte një çek dentar vjetor prej 300 frangash për personat që kualifikohen për subvencione të sigurimit shëndetësor, por që nuk marrin ndihmë tjetër sociale dhe të cilët shpesh heqin dorë nga trajtimet dentare për arsye financiare. Sipas mbështetësve, mungesa e trajtimeve dentare mund të sjellë pasoja serioze për shëndetin. Teksti synonte gjithashtu forcimin e parandalimit, transmeton albinfo.cb.

Edhe kundërpropozimi bie

Kostoja totale e programit u vlerësua në 45.5 milionë franga, përfshirë masat parandaluese dhe krijimin e një pozicioni kantonal të dentistit. Megjithatë, sipas së djathtës dhe Këshillit Shtetëror, këto masa konsideroheshin joefektive. Kjo çoi në hartimin e një kundërpropozimi me mbështetje financiare më të synuar, por edhe ai u refuzua nga votuesit.

Ky nuk është rasti i parë që gjenevasit votojnë për qasjen në kujdesin dentar. Ashtu si kantonet Vaud në vitin 2018 dhe Neuchâtel në vitin 2022, edhe në vitin 2019 u refuzua një iniciativë kushtetuese për krijimin e një sigurimi të detyrueshëm dentar.

Shkalla e pjesëmarrjes për votimin ishte 39.63% si për nismën, ashtu edhe për kundërpropozimin.