“Shkolla Shqipe” hap dyert edhe në Rapperswil – Jona të Kantonit të St. Gallenit

Një tjetër qendër e arsimit shqip në Zvicër bëhet realitet falë punës dhe përkushtimit të mësuesit Vaxhid Sejdiut dhe prindërve në rajonin e Rapperswil – Jonës, të Kantonit të St. Gallenit

Rapperswil – Jona, 8 nëntor 2025 – Në prag të festave të Nëntorit, një tjetër vatër e arsimit shqip në Zvicër u bë realitet. Falë përkushtimit të mësuesit dhe veprimtarit Dr. Vaxhid Sejdiu, në bashkëpunim me prindërit e komunitetit shqiptar, u hap zyrtarisht pika më e re e “Shkollës Shqipe” në qytetin Rapperswil – Jona të Kantonit të St. Gallenit.

Kjo nismë është dëshmi e vullnetit të palëkundur të prindërve shqiptarë për ta ruajtur gjuhën dhe kulturën amtare te brezat e rinj. Fëmijët tashmë kanë mundësinë të mësojnë shqip çdo të shtunë, në kushte të mira mësimore dhe me një atmosferë të ngrohtë bashkëpunimi.

Në ceremoninë e hapjes morën pjesë prindër e nxënës, të cilët me emocion e gëzim shënuan fillimin e këtij kapitulli të ri arsimor.

Me këtë hapje të re, “Shkolla Shqipe” forcon edhe më shumë rrjetin e saj në Zvicër dhe vijon misionin për ruajtjen e gjuhës, kulturës dhe identitetit kombëtar në diasporë.

Mësimi zhvillohet çdo të shtunë, në dy grupe – për nivelin e parë dhe për nivelin e dytë – në ambientet e shkollave zvicerane, me kushte të përshtatshme dhe atmosferë të ngrohtë për fëmijët.

Ceremonia e hapjes u mbajt të shtunën, më 8 nëntor 2025, në prag të festave të Nëntorit, dhe u shënua me shumë gëzim, emocione dhe entuziazëm nga prindërit e nxënësit e parë.

Klasa e parë në këtë qendër u mbush plot me buzëqeshje e hare. Oaza, Joni, Zekirja, Janina, Aurora, Ravana, Muhamedi, Briana, Lorisi, Lorena, Aurelei, Laurina, Loresa, Valoni, Loriku, Leoni, Aniku dhe Noari ishin ndër nxënësit e parë që morën pjesë në orët e para të mësimit në gjuhën shqipe.

Falënderime të veçanta iu drejtuan edhe Drejtorisë së shkollës në Rapperswil – Jona, e cila me mirëkuptim dhe bashkëpunim të plotë mbështeti hapjen e kësaj pike të re shkollore.

Ashtu si në çdo vend ku vepron, “Shkolla Shqipe” në Zvicër vijon misionin e saj fisnik për ruajtjen e gjuhës, kulturës dhe identitetit shqiptar në diasporë.

Thënë shkurt, një tjetër rreze drite u shtua sot në horizontin e arsimit shqip në Zvicër – “Shkolla Shqipe” në Rapperswil – Jona është tashmë realitet!

Sektori për informim

 

---