Marigona nis postdoktoraturën si Fulbright Visiting Scholar në Los Angeles

Fillon angazhimi akademik i Marigonës në kuadër të programit Fulbright

Profesoresha Marigona Bekteshi–Ferati ka nisur një kapitull të ri në karrierën e saj akademike si Fulbright Visiting Scholar dhe kërkuese postdoktorale në Los Angeles, Shtetet e Bashkuara të Amerikës, përcjell albinfo.ch.

Gjatë qëndrimit të saj, ajo do të ligjërojë për dy semestra në Stella Adler Academy of Acting & Theatre, një nga akademitë më prestigjioze në botë të arteve të interpretimit, ndërkohë që do të përfundojë edhe programin e saj të postdoktoraturës.

Stella Adler Academy njihet për historinë e saj të pasur dhe për figurat e mëdha që kanë studiuar apo ligjëruar aty, përfshirë Marlon Brando, Robert De Niro, Warren Beatty, Harvey Keitel dhe Benicio del Toro, duke mbetur një qendër e rëndësishme e formimit artistik dhe pedagogjik në nivel botëror.

Bursa Fulbright, e njohur shpesh si “Oscari Akademik”, është një nga programet më prestigjioze ndërkombëtare që mbështet ekselencën në arsim dhe kërkim shkencor. Ajo u ofron studiuesve mundësi për të zhvilluar projekte me ndikim global dhe për të shkëmbyer përvoja akademike ndërkulturore./Albinfo.ch

---