Jurgen Uldedaj në histori, kampion bote në IBO

Ky është titulli i parë botëror në historinë e boksit shqiptar në këtë organizatë, një arritje që e ngjit Uldedajn në elitën e sportit ndërkombëtar

Boksieri shqiptar Jurgen Uldedaj ka hyrë në histori, pasi është shpallur kampion bote nga International Boxing Organization (IBO), në kategorinë IBO Cruiserweight, pas fitores ndaj kamerunasit Rolly Lambert Fogoum.

Ndeshja u zhvillua në “O₂ Arena” të Londrës dhe përfundoi me fitoren e shqiptarit pas një dueli të fortë e të ekuilibruar në raundet e para, por që Uldedaj e dominoi në fund duke fituar me vendim të gjyqtarëve, transmeton albinfo.ch.

Ky është titulli i parë botëror në historinë e boksit shqiptar në këtë organizatë, një arritje që e ngjit Uldedajn në elitën e sportit ndërkombëtar.

Deri tani, ai numëron 21 fitore në karrierë, prej të cilave 12 me nokaut, dhe ka mbajtur më parë tituj si “WBO Youth”, “WBC Youth”, “IBF International”, “WBA Inter-Continental” dhe “IBO Mediterranean”.

Edhe pse stërvitet mes Gjermanisë dhe Anglisë, Uldedaj vazhdon të ngrejë me krenari flamurin shqiptar në arenat më prestigjioze të boksit botëror.

Uldedaj ka shkruar në Facebook se ëndrra është bërë realitet.

“Sot është dita që kam ëndërruar gjithë jetën time. Pas shumë viteve sakrifice, mundi dhe besimi në Zot, u shpalla Kampion i Botës IBO në peshën cruiser. Ky titull nuk është vetëm i imi – është për gjithë shqiptarët kudo që janë. Për ata që besuan tek unë, për ata që më mbështetën, dhe për çdo djalë apo vajzë që ka një ëndërr — asgjë nuk është e pamundur nëse nuk dorëzohesh. Faleminderit ekipit tim, familjes, trajnerëve dhe çdo personi që ka qenë pjesë e këtij rrugëtimi. Sot shkruam histori për Shqipërinë”, ka shkruar ai.

---