Një takim në OYM: diplomacia, biznesi dhe sporti bashkojnë forcat për ide të reja

Një grup personalitetesh shqiptaro-zvicerane – ndërmarrës, mjekë dhe bankierë – së bashku me ambasadorin e Republikës së Kosovës në Zvicër, Mentor Latifi, vizituan qendrën inovative OYM (On Your Marks) në Cham, Zug, një nga qendrat më moderne sportive dhe shkencore në Evropë.

Mysafirët u pritën nga Hans-Peter Strebel, themelues i OYM dhe një ndër figurat më vizionare të sportit zviceran. Gjatë vizitës, Strebel i njohu të ftuarit me konceptin unik të qendrës, ku trajnimet atletike, rehabilitimi dhe kërkimi shkencor bashkohen në një hapësirë të projektuar me precizion dhe estetikë moderne.

Që nga hapja në vitin 2020, OYM është shndërruar në një pikë referimi për sportin elitar zviceran, duke ofruar kushte optimale për sportistët e federatave kombëtare dhe për klubet më të suksesshme në vend.

Sipas drejtuesve të qendrës, “kujdesi shkencor dhe individual ndaj sportistëve është çelësi i suksesit – me dy synime kryesore: maksimizimin e adaptimit në trajnim dhe përmirësimin e performancës specifike për çdo disiplinë sportive.”

Në përfundim të vizitës, Shpresa Fejzulahi, asistente personale e Hans-Peter Strebel dhe kryetare e bordit të kompanisë Beyond Design, zhvilloi një intervistë ekskluzive me ambasadorin Mentor Latifi dhe Hans-Peter Strebel. Të dy i bashkon një histori interesante: kanë filluar karrierën në industrinë farmaceutike, ndërsa sot janë të angazhuar në fusha krejtësisht të ndryshme – njëri në diplomaci, tjetri në investime në sport dhe zhvillim urban.

Për konceptin e brendshëm arkitektonik të OYM ishte përgjegjëse Myriam von Rickenbach, bashkëthemeluese e Beyond Design dhe arkitekte e brendshme. Ajo luajti një rol kyç në krijimin e një hapësire funksionale dhe frymëzuese, që ndikon drejtpërdrejt në përvojën dhe performancën e sportistëve.

Hans-Peter Strebel – nga farmaceutika në filantropi dhe sport

Hans-Peter Strebel është ndërmarrës dhe filantrop me një karrierë mbresëlënëse në industrinë farmaceutike. Në vitin 2006 ai shiti kompaninë e tij tek Biogen, dhe që atëherë është angazhuar personalisht e financiarisht në projekte që lidhen me sportin, shkencën, arsimin dhe zhvillimin shoqëror. Ai është themelues i OYM dhe aksionari kryesor i klubit EV Zug.

Vizita ishte organizuar nga Besfort Bilalli, ish-hendbollist profesionist dhe sot sipërmarrës. Organizata e tij SBN ka për qëllim të lidhë botën e sportit me atë të biznesit.