E reja nga Kosova humb jetën tragjikisht në Gjermani

Aksident fatal në Gjermani

Një aksident i rëndë trafiku ka ndodhur më 22 tetor në Gjermani, ku si pasojë e plagëve të marra ka humbur jetën e reja nga Kosova, J.K, transmeton albinfo.ch.

Lajmin për vdekjen e saj e kanë konfirmuar organet e policisë gjermane dhe familjarët e të ndjerës, të cilët kanë bërë të ditur se trupi i saj tashmë është sjellë në Kosovë.

Sipas njoftimit të familjes, sot pritet t’i jepet lamtumira e fundit në varrezat e fshatit Mazgit të Obiliqit, aty ku jetonte familja e saj.

Ngjarja ka shkaktuar dhimbje të madhe në mesin e familjarëve, miqve dhe bashkëstudentëve të saj, të cilët e kanë përshkruar J.K.-në si një vajzë shembullore, me ëndrra dhe synime të mëdha për të ardhmen.

“Me dhimbje të thellë njoftojmë se në Gjermani tragjikisht humbi jetën mbesa ime, studente shembullore e Fakultetit Juridik. Prehu në parajsë, engjëlli i xhaxhit”, ka shkruar njëri nga të afërmit e saj në rrjetet sociale.

Autoritetet gjermane po vazhdojnë hetimet për rrethanat e sakta të aksidentit. /Albinfo.ch

---