Merkel ia thotë troç Mustafës: S’ka asnjë shans të azilit për kosovarët

Kancelarja gjermane, Angela Merkel dhe kryeministri i Kosovës, Isa Mustafa, janë shprehur edhe një herë kundër aplikimeve të mëtejshme për azil nga shqiptarët e Kosovës në Gjermani.

Gjatë takimit të përbashkët të martën në Berlin mes kancelares gjermane Angela Merkel dhe kryeministrit të Kosovës, Isa Mustafa, ndër të tjera kanë diskutuar edhe për numrin e lartë të refugjatëve të Kosovës në Gjermani.

“Dëshiroj të ritheksoj që pothuajse nuk ka asnjë shans që t’iu njihet kërkesa për azil kosovarëve”, ka thënë kancelarja Merkel.

Ndërkohë edhe kryeministri Mustafa ka kërkuar nga shteti gjerman që të kthehen të gjithë refugjatët që kanë aplikuar për azil kohët e fundit. “Ata që kanë ardhur kohët e fundit duhet të kthehen”, ka thënë Mustafa. “Kosova është një vend i sigurt”, raporton “onvista.de”, transmeton albinfo.ch.

Merkel premtoi se do të ndihmojë Kosovën për të përmirësuar kushtet e jetesës atje.