Tri komuna arbëreshe në Itali shpallen zona të mbrojtura kulturore

Ministri i Shtetit dhe drejtuesi politik për diasporën në Partinë Socialiste të Shqipërisë Taulant Balla, mori pjesë në festivalin “Vëllazëria” që u mbajt në rajonin e Puglias, Itali, duke theksuar rëndësinë e ruajtjes së kulturës arbëreshe.

Në këtë aktivitet kulturor, tri komuna arbëreshe, Casalvecchio, Chieuti dhe San Marzano di San Giuseppe, u shpallën zyrtarisht si zona të mbrojtura kulturore në Puglia. Ky akt simbolik nënvizon përkushtimin për ruajtjen e trashëgimisë së pasur të komuniteteve arbëreshe, raportojnë mediat shqiptare.

Gjatë fjalës së tij, ministri Balla vlerësoi komunitetin arbëresh si një shembull frymëzues të ruajtjes së gjuhës dhe traditave kombëtare për më shumë se 500 vjet. Ai shtoi se diaspora shqiptare në Itali dhe komuniteti arbëresh janë “një urë lidhëse e fortë mes dy popujve”, duke theksuar rëndësinë e përfshirjes së diasporës në ruajtjen e identitetit kombëtar.

Festivali “Vëllazëria”, që këtë vit shënoi edicionin e tetë, u mbajt më 26 dhe 27 korrik në Casalvecchio di Puglia. Mbi 100 artistë, këngëtarë dhe valltarë nga komunitetet arbëreshe të Italisë dhe nga Shqipëria, veçanërisht nga Vlora, morën pjesë në një program të pasur kulturor dhe gastronomik.

Ndërkohë, në Korçë, fundjava u shënua nga një tjetër aktivitet frymëzues me tematikë arbëreshe, “ArbNight – Ethno Pulse”, një udhëtim muzikor që solli tinguj nga zemra e Arbërisë në Pazarin e Vjetër. Ngjarja u organizua nga Qendra e Artit, Kulturës dhe Inovacionit në bashkëpunim me COD-in dhe me mbështetjen e Bashkisë së Korçës.

Publiku u mahnit nga interpretimet unike të fizarmonicistit arbëresh Pierpaolo Petta nga Piana degli Albanesi në Sicili, i shoqëruar nga këngëtari Bledi Polena dhe kitaristi Nuçiel Doko. Koncerti solli pjesë të rralla të folklorit arbëresh të Sicilisë dhe këngë të dashura të trashëgimisë etno-muzikore shqiptare.