Me biçikleta drejt atdheut: Dy vëllezër nisin rrugëtimin nga Zvicra në Kosovë

Dy vëllezër kosovarë nisin një udhëtim të veçantë me biçikleta nga Zvicra drejt Kosovës

Visari dhe Shkëlqim Korbi, dy vëllezër nga Gjilani, janë nisur në një aventurë të pazakontë, një udhëtim me biçikleta nga Zvicra për në Kosovë, përgjatë një rruge që përllogaritet të jetë rreth 1,500 kilometra e gjatë, transmeton albinfo.ch.

Ky udhëtim, që e kishin planifikuar prej dy vitesh, më në fund po realizohet këtë verë. Vëllezërit mërgimtarë, edhe pse jetojnë në vende të ndryshme, janë bashkuar në Zagreb të Kroacisë për të vijuar rrugën së bashku drejt vendlindjes.

Ata u nisën të premten e kaluar dhe presin të mbërrijnë në Kosovë të hënën e ardhshme. Udhëtimi i tyre nuk është vetëm fizik, por edhe emocional, një mënyrë për t’u lidhur me rrënjët dhe për të përjetuar një eksperiencë unike që i lidh më shumë me vendin e tyre. /Albinfo.ch

 

---