Maqedonia e Veriut planifikon taksa për të pamartuarit për të frenuar krizën demografike

EPA/VALDRIN XHEMAJ

Kryeministri i Maqedonisë së Veriut, Hristijan Mickoski, ka paralajmëruar vendosjen e taksave shtesë për personat e pamartuar si pjesë e masave për të nxitur rritjen e natalitetit.

Gjatë një aktiviteti qeveritar, ai theksoi se vendi po përballet me një krizë të thellë demografike, duke treguar se në vitin 2024 janë regjistruar vetëm 16,061 lindje krahasuar me 20,201 vdekje, çka ka sjellë një rënie natyrore të popullsisë prej mbi 4,000 personash brenda një viti, përcjell albinfo.ch.

“Në katër vitet e fundit kemi humbur mbi 33 mijë banorë, sa një qytet si Kavadari apo Kërçova,” deklaroi Mickoski. Ai shtoi se norma e lindshmërisë ka rënë nga 12,5 për mijë banorë në vitin 2010, në 8,8 për mijë në vitin 2024, ndërsa në shumë komuna rurale nuk ka më nxënës të klasës së parë dhe numri i personave që jetojnë vetëm vazhdon të rritet.