Alarmi i rremë për bombë në Kuvend, thirrja dyshohet se erdhi nga Serbia

Alarm i rremë për bombë tronditi të shtunën mëngjesin në Kuvendin e Kosovës, duke ndërprerë përpjekjen e 42-të për konstituimin e tij. Pas evakuimit të objektit dhe kontrollit disaorësh nga njësitet e sigurisë, u konstatua se kërcënimi ishte i pavërtetë, ndërsa hetimet e para të Policisë së Kosovës kanë nxjerrë në pah dyshime se telefonata kërcënuese erdhi nga Serbia, raporton albinfo.ch.

Në një njoftim zyrtar, Policia e Kosovës bëri të ditur se “bazuar në hetimet e deritanishme, dyshohet se kërcënimet kanë ardhur përmes një numri telefoni që dyshohet se është nga Serbia”. Autoritetet shtojnë se janë duke punuar në koordinim me institucionet vendore dhe partnerët ndërkombëtarë të sigurisë për të zbardhur plotësisht rastin.

Sipas kryeprokurorit të Prokurorisë Themelore në Prishtinë, Zejnullah Gashi, thirrja anonime u bë nga një zë mashkulli që fliste në anglisht me një aksent që, siç theksoi ai, “ngjason me atë të vendeve jomike ndaj Kosovës”. Ai bëri të ditur se për këtë rast janë angazhuar edhe ekipet e krimit kibernetik dhe se hetimet do të vazhdojnë në drejtim të identifikimit të personit që qëndron pas kësaj thirrjeje.

“Ka rezultuar që kërcënimi ka qenë i rremë dhe deri më tani nuk ka diçka që ia vlen të ceket sa i përket rezultateve nga vendi i ngjarjes. Hetimet do të vazhdojnë për të përcaktuar prejardhjen e saktë të thirrjes”, u shpreh Gashi.

Pas një ndërprerjeje disaorëshe, Kuvendi rifilloi punimet në mbrëmje, por edhe kësaj here seanca përfundoi pa zgjedhjen e kryetarit të ri të Kuvendit, duke e zgjatur krizën institucionale që po zvarritet prej javësh, raporton albinfo.ch.