Kosovë: Javën e ardhshme priten temperatura të larta, apelohet për kujdes

(AP Photo/Visar Kryeziu)

Java që vjen do të karakterizohet me mot të qëndrueshëm, me temperatura të larta dhe diell të vazhdueshëm në të gjithë territorin e Kosovës. Kështu ka bërë të ditur Instituti Hidrometeorologjik i Kosovës (IHK), në parashikimin javor të publikuar këtë të diel, raporton albinfo.ch.

Sipas IHK-së, moti përgjatë javës do të jetë kryesisht i kthjellët dhe me diell, me temperatura që në shumë zona do të kalojnë 35 gradë Celsius. Temperaturat minimale do të sillen nga 10 deri në 17°C, ndërsa ato maksimale pritet të lëvizin nga 28 deri në 37°C.

Instituti ka bërë apel për kujdes të shtuar, veçanërisht gjatë orëve të mesditës, për fëmijët, të moshuarit dhe personat me probleme shëndetësore që janë më të ndjeshëm ndaj temperaturave të larta dhe rrezeve të forta të diellit.

IHK nënvizon rëndësinë e hidratimit të rregullt dhe shmangien e ekspozimit të zgjatur në diell gjatë orëve më të nxehta të ditës. Po ashtu, rekomandohet përdorimi i kremrave mbrojtës dhe veshje të lehta për mbrojtje nga rrezatimi UV, raporton albinfo.ch.