Kosova miraton vendimin për pranimin e deri në 50 emigrantëve nga SHBA

Qeveria e Kosovës ka miratuar të mërkurën një vendim për të pranuar deri në 50 emigrantë nga Shtetet e Bashkuara të Amerikës gjatë një periudhe njëvjeçare. Këta persona do të qëndrojnë përkohësisht në Kosovë, si pjesë e një marrëveshjeje bashkëpunimi ndërmjet dy shteteve, me qëllim të lehtësimit të kthimit të sigurt në vendet e tyre të prejardhjes, raporton albinfo.ch.

Sipas vendimit të miratuar nga ekzekutivi, emigrantët do të kenë mbrojtje të përkohshme dhe të menjëhershme në territorin e Republikës së Kosovës, ndërsa do të veprojnë në përputhje me legjislacionin vendas dhe do të gëzojnë të gjitha të drejtat e garantuara nga ligji.

“Personat subjekt të këtij vendimi, gjatë kohës së qëndrimit në Republikën e Kosovës, do të veprojnë në përputhje me legjislacionin në fuqi dhe do të gëzojnë të drejtat e përcaktuara me legjislacionin në fuqi”, thuhet në dokumentin e qeverisë.

Kryeministri në detyrë, Albin Kurti, përmes një postimi në Facebook theksoi se përzgjedhja e këtyre personave do të bëhet nga një listë e propozuar, në bazë të kritereve që lidhen me sundimin e ligjit dhe rendin publik.

“Shtetet e Bashkuara të Amerikës mbeten aleat i yni i palëkundur dhe Republika e Kosovës do të jetë gjithmonë partner i besueshëm i tyre. U jemi përherë mirënjohës për ndihmën dhe bashkëpunimin e vazhdueshëm, dhe e vlerësojmë lartë mbështetjen në mbrojtje e zhvillim, e sidomos në rrugëtimin tonë drejt integrimit Euro-Atlantik,” ka deklaruar Kurti, transmeton albinfo.ch.