LVV: Të shqyrtohet mbajtja e zgjedhjeve lokale dhe të përgjithshme në të njëjtën datë

Deputetja e Lëvizjes Vetëvendosje, Albulena Haxhiu, ka bërë të ditur se gjatë takimit të së mërkurës me Presidenten e Kosovës, Vjosa Osmani, ka propozuar që zgjedhjet lokale dhe ato të përgjithshme të mbahen në të njëjtën datë, raporton albinfo.ch.

Sipas Haxhiut, kjo ide u përmend për shkak të pamundësisë aktuale për arritjen e një marrëveshjeje politike për formimin e institucioneve të reja shtetërore. Megjithatë, ajo theksoi se Vetëvendosje është e përkushtuar për konstituimin e Kuvendit dhe formimin e Qeverisë.

“Duke qenë se nuk po gjendet marrëveshje politike për krijimin e institucioneve, përmenda edhe idenë që zgjedhjet lokale dhe të përgjithshme të mbahen në të njëjtën datë. Por për ne është me rëndësi që zgjedhjet lokale të mbahen sa më shpejt,” tha Haxhiu.

Ajo po ashtu përmendi disa nga datat më të mundshme që u diskutuan gjatë takimit, si 5, 12 dhe 19 tetor. “Qëndrimi ynë është që sa më herët të shpallen zgjedhjet, aq më mirë, duke pasur parasysh mundësinë e balotazhit,” theksoi deputetja.

Sa i përket përgatitjeve të brendshme, Haxhiu tha se Lëvizja Vetëvendosje ka nisur me shpalljen e kandidaturave dhe se në komunat ku qeverisin aktualisht do të garojnë me kryetarët ekzistues. “Shumë shpejt do t’i kemi të gjithë kandidatët për kryetarë të komunave,” shtoi ajo.

Zyra e Presidentes ka njoftuar se data e zgjedhjeve lokale do të caktohet në ditët në vijim, pas konsultimeve me përfaqësuesit politikë, raporton albinfo.ch.