Ofertë zhgënjyese nga Napoli për Zhegrovën

(AP Photo/Christophe Ena)

Zyrtarët e Lille janë shprehur jo të kënaqur me ofertën që kanë pranuar për Edon Zhegrovën. Siç raporton mediumi i afërt me klubin francez “lepetitlillois”, Napoli ka ofruar vetëm 12 milionë euro për transferimin e Zhegrovës, përcjell albinfo.ch.

Ndërkohë, Lille kërkon 20 milionë euro për ta liruar sulmuesin e krahut. Zhegrova i ka munguar Lille-it që nga dhjetori i vitit të kaluar për shkak të një lëndimi, ndërsa nga situata e tij synon të përfitojë skuadra italiane duke ofruar vetëm 12 milionë euro.

Zhegrova ka bërë të ditur se nuk do ta zgjasë kontratën e tij, duke lënë të hapur mundësinë për t’u larguar gjatë verës.

Krahas Napolit, interesim për Zhegrovën kanë shprehur edhe disa klube të tjera.

Zhegrova, 26-vjeçar, shënoi tetë gola dhe asistoi dy herë në 21 ndeshje në të gjitha garat e këtij edicioni.

Ai me skuadrën e Lille-it ka kontratë deri në verën e vitit të ardhshëm.