620 vjet nga lindja e Skënderbeut: Shqiptarët nderojnë heroin kombëtar në trojet etnike dhe diasporë

Aktivitetet përkujtimore u zhvilluan në qytete të ndryshme, ndër to edhe në Gjakovë, ku morën pjesë edhe shoqata shqiptare nga Zvicra

 

Më 6 maj 1405, në malet e Dibrës, lindi Gjergj Kastrioti Skënderbeu – një ndër figurat më të ndritura të historisë shqiptare. Edhe pse kanë kaluar 620 vjet, ai vazhdon të jetë simboli i qëndresës, unitetit dhe krenarisë kombëtare.

Në këtë përvjetor, shqiptarët kudo, nga Gjakova në Ulqin, nga Tirana në Shkup dhe nga Prishtina deri në diasporë, u mblodhën për të nderuar me përulësi dhe respekt figurën e tij. Aktivitetet përkujtimore u zhvilluan në qytete të ndryshme, ndër to edhe në Gjakovë, ku një vit më parë u vendos shtatorja madhështore e Skënderbeut, tashmë një simbol i rëndësishëm i identitetit shqiptar.

 

Në këtë ceremoni, morën pjesë përfaqësues të shoqatave kulturore dhe intelektualë, si dhe qytetarë të shumtë, që e nderuan heroin e kombit. Po ashtu, përfaqësues të diasporës shqiptare nga Zvicra, veçanërisht nga Shoqata “Gjergj Kastrioti – Skënderbeu” dhe Shoqata “Hora e Skënderbeut Zvicër”, morën pjesë në homazhe dhe aktivitete përkujtimore.

Agim Pepaj, kryetar i Shoqatës “Gjergj Kastrioti – Skënderbeu”, e theksoi rëndësinë e figurës së Skënderbeut për shqiptarët, duke deklaruar: “Ai është udhërrëfyes i përjetshëm për kombin shqiptar, duke na kujtuar se liria, dinjiteti dhe uniteti janë vlera që duhen ruajtur me çdo çmim”.

Shoqata “Hora e Skënderbeut Zvicër”, e themeluar në shtator 2023 nga mërgimtarët shqiptarë, po kontribuon në ruajtjen dhe promovimin e trashëgimisë kulturore shqiptare. Një ndër aktet më të rëndësishme të kësaj shoqate ishte dhurimi i një shtatoreje të Skënderbeut për Bashkinë Hora e Arbëreshëvet në Sicili, një veprim që thekson lidhjet e forta mes shqiptarëve dhe arbëreshëve.

“620 vite pas, ne nuk po kujtojmë thjesht një datë, por po ringjallim besën që i kemi dhënë trashëgimisë sonë kulturore e kombëtare,” u shpreh Veli Genc Berisha, përfaqësues i Shoqatës “Hora e Skënderbeut Zvicër”.

Aktivitete të ngjashme u zhvilluan edhe në qytete të tjera, si Tiranë, Krujë, Prishtinë, dhe shumë më tepër, ku institucione arsimore, shoqata dhe qendra kulturore organizuan ekspozita, orë letrare, interpretime artistike dhe aktivitete edukative për të rinjtë.

Gjergj Kastrioti Skënderbeu, që dikur ndali përparimin e Perandorisë Osmane për më shumë se dy dekada, sot mbetet një nga shtyllat morale të kombit shqiptar. Emri i tij vazhdon të valëvitet si një flamur i pathyeshëm, i respektuar nga shqiptarët kudo, si një simbol i qëndresës dhe krenarisë që do të mbetet i pavdekshëm në kujtesën e brezave të ardhshëm.

 

 

---