Zvicra pret bllokime të mëdha trafiku gjatë Pashkëve

Foto nga arkiva

Zyra Federale e Rrugëve e Zvicrës (Astra) paralajmëron për bllokime të konsiderueshme dhe pengesa të mëdha trafiku në aksin veri-jug gjatë festave të Pashkëve, veçanërisht në autostradën A2 para tunelit të Gotthardit dhe A13 drejt San Bernardinos. Vëllimi i lartë i trafikut pritet të nisë herët pasditen e së mërkurës dhe do të intensifikohet në ditët në vijim.

Një faktor shtesë i rëndësishëm është edhe mbyllja dimërore e rrugës përmes kalimit të Gotthardit, e cila do të mbetet e bllokuar gjatë gjithë festës. Qeveria federale ende nuk ka dhënë një përgjigje për mocionin parlamentar që kërkon hapjen e rrugës gjatë gjithë vitit, transmeton albinfo.ch.

Për të kufizuar ndikimin negativ të trafikut të tërthortë në zonat rurale përgjatë akseve kombëtare, Astra apelon udhëtarët të qëndrojnë në autostradë, edhe kur përballen me bllokime. Për këtë qëllim, janë vendosur shtatë pika të reja “dozimi” në kantonin Nidwalden që kontrollojnë fluksin e automjeteve duke bllokuar hyrjen me drita të kuqe në rast bllokimesh, për të parandaluar devijimet.

Edhe kantoni Uri ka aktivizuar masa të posaçme: hyrjet në Göschenen dhe Wassen do të mbyllen nëse kolonat arrijnë tre kilometra. Në rast të bllokimeve mbi tetë kilometra, shpejtësia në autostradë midis Altdorf dhe Amsteg do të kufizohet në 80 km/h për të reduktuar aksidentet.

Ndërkohë, edhe udhëtimi me tren pritet të përballet me vështirësi. Punimet e rinovimit në tunelin Simplon do të ndikojnë në transportin e makinave mes Brig dhe Italisë, duke kufizuar shërbimin në çdo dy orë. Kohë pritjeje priten edhe në stacionet e ngarkimit të makinave në Furka, Lötschberg dhe Vereina, shkruan Swissinfo.ch.

Për të përballuar fluksin e lartë të udhëtarëve drejt jugut, Hekurudhat Federale të Zvicrës (SBB) do të ofrojnë 20 trena shtesë në aksin Gotthard nga e enjtja deri të hënën e Pashkëve, duke siguruar rreth 64,000 vende shtesë. Trenat Eurocity për në Itali gjithashtu do të forcohen, me dy lidhje shtesë nga Lugano në Milano të Premten e Madhe. SBB rekomandon planifikim të hershëm të udhëtimeve për të shmangur mbingarkesat, transmeton albinfo.ch.

Sipas Viasuisse, vala e udhëtimeve të kthimit do të fillojë të dielën e Pashkëve, me pikat më kritike të hënën pasdite, kur pritet kolonë deri në 21:00 në drejtim të veriut para portalit jugor në Airolo. Vonesa të vogla mund të vazhdojnë edhe të martën.

Për vite me radhë, bllokimet e trafikut në Gotthard gjatë Pashkëve janë kthyer në një fenomen të zakonshëm. Rekordi mbetet ai i vitit 1998 me një bllokim prej 25 kilometrash, ndërsa në vitin 2022, u regjistrua një kolonë prej 22 kilometrash. Megjithatë, në vitin 2024, trafiku ra ndjeshëm, me vetëm 11 kilometra kolonë në ditën kulmore – një rënie që mund t’i atribuohet kushteve të pafavorshme atmosferike në jug.

Udhëtarët këshillohen të monitorojnë informacionet më të fundit të trafikut dhe të jenë të përgatitur për kohë të zgjatura pritjeje gjatë fundjavës festive, shkruan Swissinfo.ch, transmeton albinfo.ch.