Ndryshimet që pëson trupi pas ndërrimit të orës

pixabay

Ndryshimi i orës: Si ndikon tek trupi ynë dhe si të përshtatemi më lehtë

Me ndryshimin e orës, trupi ynë përjeton një sërë avantazhesh, por edhe disavantazhesh. Organizmi e ndien menjëherë këtë ndryshim, njësoj siç ndodh kur kalojmë nga një zonë orare në një tjetër pas një udhëtimi të gjatë ajror.

Sipas disa studimeve, më të ndjeshëm ndaj këtij ndryshimi janë fëmijët dhe të moshuarit. Trupi mund të vijojë të përjetojë pasojat edhe në ditët që pasojnë. Një studim i publikuar në Neuroscience Letters tregon se gjatë periudhës së kalimit nga ora diellore në atë ligjore, dhe anasjelltas, njerëzit tentojnë të flenë më pak dhe të shohin më pak ëndrra, transmeton albinfo.ch.

Ky ndryshim ndikon gjithashtu në nivelin e stresit dhe shkakton lodhje të përgjithshme, duke ulur aftësinë për t’u përqendruar. Për këtë arsye është vërejtur një rritje e aksidenteve rrugore, veçanërisht të hënën e parë pas fundjavës së ndërrimit të orës.

Megjithatë, studimet tregojnë gjithashtu se, përveç të hënës së parë, incidentet vdekjeprurëse në rrugë ulen gjatë periudhës kur është në fuqi ora ligjore. Kjo mendohet të ndodhë për shkak të sasisë më të madhe të dritës natyrore në orët kur njerëzit kthehen nga puna.

Si të përballojmë ndryshimin e orës?
Mënyra më e mirë është të përgatitemi gradualisht një ose dy ditë përpara, në mënyrë që trupi të pësojë sa më pak tronditje dhe të shmangim ndjesinë e lodhjes.