Delegacioni i Kongresit Amerikan viziton Zvicrën

Foto: Ignazio Cassis, X

Gjashtë anëtarë të Kongresit të SHBA po zhvillojnë takime me përfaqësues të qeverisë zvicerane në Bernë për të diskutuar çështje të politikës së jashtme, ekonomisë, financave dhe shkencës. Delegacioni, i përbërë nga Andy Harris, Bill Huizenga, Nicole Malliotakis, Lloyd Doggett, Stephen Lynch dhe Donald Norcross, do të takohet me këshilltarët federalë Ignazio Cassis dhe Guy Parmelin, si dhe me sekretarët e shtetit Helene Budliger Artieda, Daniela Stoffel, Alexandre Fasel dhe Markus Mäder, përcjell albinfo.ch.

Takimi zhvillohet në një moment të ndjeshëm për marrëdhëniet tregtare mes dy vendeve, pasi SHBA ka vendosur Zvicrën në listën e vendeve me “praktika të padrejta tregtare”. Për të shmangur përplasjet tregtare, Helene Budliger Artieda është takuar të martën në Uashington me shefin e stafit të Përfaqësuesit të Tregtisë së SHBA.

Pas vizitës në Bernë, delegacioni amerikan do të udhëtojë të premten në Gjenevë, ku do të takojë ambasadorin zviceran në OKB dhe përfaqësues të Komitetit Ndërkombëtar të Kryqit të Kuq dhe CERN-it. Sipas Departamentit Federal të Punëve të Jashtme të Zvicrës, kjo vizitë është pjesë e takimeve të rregullta midis dy vendeve dhe është planifikuar prej disa muajsh.