Nuk do të lejohen të sjellin prindërit e tyre jashtë BE/EFTA për të jetuar në Zvicër

Këshilli Kombëtar ndoqi shembullin e Këshillit të Shteteve të hënën dhe hodhi poshtë projektligjin që synonte të eliminonte diskriminimin me të cilin përballen zviceranët – kryesisht qytetarë të natyralizuar – në lidhje me bashkimin familjar me prindërit nga vendet e treta, përcjell albinfo.ch.

Kjo do të thotë që, në të ardhmen, qytetarët zviceranë mund të aplikojnë për një leje hyrjeje për bashkëshortin ose partnerin e tyre të regjistruar jashtë BE/EFTA (Norvegji, Islandë dhe Lihtenshtajn), si dhe për fëmijët e tyre nën moshën 18 vjeç, por ata nuk mund t’i sjellin prindërit e tyre për të jetuar në Zvicër.

Ky vendim prek kryesisht shtetasit zviceranë të natyralizuar (shpesh me shtetësi të dyfishtë), të cilët mund të dëshirojnë që prindërit e tyre nga vendet e treta të jetojnë me ta në Zvicër.

Kushtet e bashkimit familjar janë më pak të rrepta për anëtarët e familjes së shtetasve zviceranë që vijnë nga shtetet e BE/EFTA – atyre u lejohet të sjellin bashkëshortin ose partnerin e regjistruar, çdo fëmijë dhe nipër nën moshën 18 vjeç, si dhe prindërit dhe gjyshërit e tyre në ngarkim.