Merr flakë aeroplani i American Airlines, detyrohet të bëjë ulje emergjente – publikohen pamjet

Një aeroplan pasagjerësh me 178 persona në bord ka marrë flakë pas një defekti në motor dhe është detyruar të devijohet për në Denver.

Fluturimi 1006 i American Airlines, një Boeing 737-800, po udhëtonte nga Kolorado Springs për në Dallas Fort Worth, kur ekuipazhi raportoi dridhje të motorit, njoftoi Administrata Federale e Aviacionit (FAA).

Aeroplani më pas u devijua në Denver, Kolorado, dhe u ul i sigurt.

Imazhet e publikuara në rrjetet sociale tregojnë flakë dhe tym në një prej motorëve.

Bëhet e ditur se FAA do të hetojë zjarrin, shkruan skynews, përcjell albinfo.ch. 

American Airlines tha se të gjithë 172 pasagjerët dhe gjashtë anëtarët e ekuipazhit në bord kishin mundur të dilnin nga aeroplani.

Ndërsa Aeroporti Ndërkombëtar i Denverit konfirmoi se 12 persona u dërguan në spital për lëndime të lehta.

“Falënderojmë anëtarët tanë të ekuipazhit, ekipin e aeroportit dhe reaguesit e parë për veprimin e tyre të shpejtë dhe vendimtar, me sigurinë e të gjithëve në bord dhe në tokë si prioritet,” tha American Airlines

VIDEO – https://youtu.be/T1HMPhRllfw

Ndryshe, ka pasur një sërë incidentesh të profilit të lartë të fundit të aviacionit që kanë ngritur pikëpyetje në lidhje me sigurinë e aviacionit në SHBA.

Ato përfshijnë përplasjen në ajër të një aeroplani rajonal të American Airlines dhe një helikopteri të ushtrisë më 29 janar që vrau 67 njerëz pranë aeroportit Ronald Reagan në Uashington.

Muajin e kaluar, një aeroplan rajonal i Delta Air Lines u kthye përmbys pas uljes në aeroportin e Kanadasë në Toronto Pearson, gjatë motit me erë. Nga 80 personat në bord, 18 u lënduan.