Qeveria e re e Austrisë synon të ndalojë bashkimin familjar për emigrantët

Masa e planifikuar do të prekte ata që kishin të drejtë azili, të cilët kishin shpresuar t’i bashkoheshin të afërmit e tyre

Qeveria e re e koalicionit të qendrës së djathtë në Austri ka vendosur të ndalojë përkohësisht procedurat e bashkimit familjar për emigrantët, duke argumentuar se vendi po përballet me një mbingarkesë të ardhurish dhe nuk ka kapacitetin e duhur për t’i integruar ata siç duhet.

“Masa do të miratohet nga parlamenti sa më shpejt të jetë e mundur dhe do të jetë e përkohshme”, njoftoi qeveria e koalicionit, e përbërë nga Partia Popullore Konservatore Austriake (ÖVP), Partia Social Demokrate (SPÖ) dhe NEOS liberale.

Sipas kancelarit Christian Stocker, “Midis 2023 dhe 2024, gjithsej 18,000 njerëz erdhën në Austri përmes bashkimit familjar, nga të cilët 13,000 ishin fëmijë ose të mitur”, shkruan ATSH, transmeton albinfo.ch.

“Duke pasur parasysh këtë shifër, është e qartë se ne duhet të marrim përgjegjësinë dhe të shtypim butonin e pauzës tani për tani”, tha Stocker.

Ministri i Brendshëm, Gerhard Karner foli për tendosje në strehim, shëndetësi dhe arsim.

Masa e planifikuar do të prekte ata që kishin të drejtë azili, të cilët kishin shpresuar t’i bashkoheshin të afërmit e tyre.

“Numri i të afërmve që bashkohen me anëtarët e familjes në Austri ka rënë ndjeshëm për rreth një vit i nxitur nga kontrollet dhe krahasimet e ADN-së, ndër të tjera”, tha Karner. Në shkurt 2024, u regjistruan pak më pak se 1 000 njerëz, krahasuar me 60 në shkurt 2025.

“Edhe nëse ky zhvillim tregon një lehtësim të situatës, është e rëndësishme të sigurohet trendi në terma afatgjatë”, shtoi Karner.

“Është një qëllim i përbashkët i koalicionit të ri trepartiak dhe ai planifikon të reduktojë migrimin e parregullt në zero”, tha sekretari i Shtetit për Punët e Brendshme, Jorg Leichtfried.

“Por, kjo nuk e ndryshon të drejtën për azil”, shtoi Leichtfried. Lëvizja është e diskutueshme sipas ligjit të BE-së, sepse vendimi duket se bie ndesh me detyrimet ligjore të BE-së për të mbrojtur të drejtën e bashkimit familjar, veçanërisht për ata që kanë të drejtë për azil.

---