Pjesëmarrje masive e votuesve në Konsullatën e Kosovës në Cyrih

Në pikën e votimit në Cyrih po pritet gjatë në radhë. Mbretëron një atmosferë miqësore, pothuaj festive, në mesin e atyre që po presin për të votuar

Radha, mbi njëqind metra e gjatë, para ndërtesës me flamurin e Kosovës, sot ishte tregues, edhe për të painformuarit, banorët e kësaj lagjeje të Cyrihut, se në këtë hapësirë po ndodhte diçka jo e përditshme. Këtu, në Konsullatën e Republikës së Kosovës po mbaheshin zgjedhjet parlamentare të Kosovës, për herë të parë në historinë e shkurtë të shtetit të Kosovës, në këtë mënyrë, në godina të përfaqësive diplomatike.

Pritja në radhë, edhe pse mund të zgjasë deri një orë, përballohet mirë, me një vetëdisiplinë shembullore, invalidëve dhe të moshuarve u jepet përparësi nga vetë pritësit. Në përgjithësi mbretëron një atmosferë miqësore, pothuaj festive, në mesin e atyre që po presin. Kundërshtitë politike, pakënaqësitë e njërit a tjetrit nuk kanë vend këtu: ato lihen vetëm për në kutitë e votimit, ku secili e jep votën për kandidatët dhe partinë e preferuar.

Votimi në ndërtesën e konsullatës zhvillohet në dy hapësira. Votuesit janë të ndarë mbi bazë të shkronjës së parë të mbiemrit të tyre, prandaj aty këtu ndodh ndonjë ngatërrim i vogël i sallës, katit ku ata duhet të votojnë.

Në përgjithësi, sipas anëtarëve të Komisionit Zgjedhor në këtë pikë votimi, gjithçka është duke rrjedhur mirë dhe sipas parashikimeve. Ata janë të kënaqur edhe me pjesëmarrjen masive të qytetarëve, gjë që duket edhe nga kolona e gjatë e atyre që vazhdojnë të presin para ndërtesë së Konsullatës së Republikës së Kosovës. Kjo ishte të paktën gjendja rreth orës 10.30 kur ne vizituam këtë pikë.

Ndryshe, sot, më 8 shkurt është ditë votimi në të gjitha përfaqësitë diplomatike dhe konsullore të Republikës së Kosovës. Në Zvicër, krahas Cyrihut, ku është përqendruar numri më i madh i shtetasve të Kosovës, po votohet edhe në Ambasadën e Kosovës në Bernë dhe në Konsullatën e Kosovës, në Gjenevë.

Komisioni Qendror i Zgjedhjeve ka njoftuar se deri në orën 11:00 të ditës së sotme, 08.02.2025, në ambasada dhe konsullata kanë votuar 4 mijë e 390 qytetarë me të drejtë vote ose 21.60 për qind.

Të drejtë vote sipas KQZ-së kanë 20 mijë e 324 votues të cilët janë regjistruar për të votuar në përfaqësinë diplomatike.

 

 

---